ನಿನ್ನ ಮಾತು

ನಿನ್ನಂತರಾಳದ ಒಂದು ಮಾತು

ನನ್ನ ಮನಸನು ಕಲಕಿಬಿಟ್ಟಿತು

ನೀ ದುಗುಡದಿಂದುಲಿದ ನುಡಿ

ಅಂತರಂಗದಿ ಮಿಡಿದುಬಿಟ್ಟಿತು

ನೀನೆಂದೊ ಆಡಿದೊಂದು ಮಾತು

ನೆನಪಲ್ಲಚ್ಚಳಿಯದಾಯಿತು

ನೀ ದೂರದಲ್ಲಿ ಕೂಗಿ ಕರೆದದು

ಕಿವಿಯಲೆ ಉಸಿರಿದಂತಿತ್ತು

ನೀ ಕಠಿಣದಿಂದ ನುಡಿದ ಪರಿಗೆ

ನಖಶಿಖಾಂತ ಅಲ್ಲಾಡಿಬಿಟ್ಟಿತು

ನೀನೆದುರು ನಿಂತು ಕೊಟ್ಟ ಕರೆ

ನನ್ನಾಲಸೆಯ ಮೆಟ್ಟಿಬಿಟ್ಟಿತು

ನೀನಾಡದೆ ಸುಮ್ಮನಾದರೂ

ಹೃದಯ ಬಡಿತ ಕೇಳಿಬಿಟ್ಟಿತು

ನೀ ಮೌನವಾಗಿ ಯೋಚಿಸಿದರೆ

ಮೌನವೇ ಮಾತಾಗಿ ಬಿಟ್ಟಿತು